Martxoan ikusitakoak (2016-III)

Birding Arbizu 

43 espezie 

IKUSITAKOEN ARGAZKIAK

Aegithalos caudatus Buztanluze

Alauda arvensis    Txortxabala/Hegatxabala

Anthus pratensis Negu txirta

Ardea cinerea   Kuartza/Lertxun hauskara

Buteo Buteo   Kalfarra/Zapelaitza

Carduelis carduelis Kardelin politta/Karnaba

Circaetus gallicus   Arrano sugezalea

Cisticola jundicis   Ihi txoria

Columba livia Usoa

Corvus corone Belea

Dendrocopos major   Okil handia

Emberiza cirlus Hesi berdantza

Erithacus rubecula   Txantxalingorri/Txantxangorri

Falco tinnunculus Belatz gorria

Fringilla coelebs Txonta arrunta

Garrulus glandarius Eskuxua/ Eskinosoa

Gyps fulvus Putrea/Sai arrea

Hirundo rustica   Iñerea/Enara arrunta

Miliaria calandra    Gari berdantza

Milvus migrans   Miru beltza

Milvus milvus Miru gorria

Motacilla alba Pinpintxoria/Buztanikara

Motacilla cinerea    Erreka pinpintxoria/ Erreka buztanikara

Neophron percnopterus   Sai zuria

Parus caeruleus Amilotx urdina

Parus major Gaztatxoria/Kaskabeltza

Passer domesticus Paretatxoria/Txolarrea

Phalacrocorax carbo Kormorana/Ubarroi handia

Phylloscopus collybita   Txio arrunta

Phoenicurus ochrurus Buztangorri iluna

Pica pica Karraka/Mika

Pyrrhula pyrrhula   Gailupa

Regulus ignicapillus Mendi erregetxo bekainzuri

Regulus regulus   Mendi erregetxo arrunta

Saxicola torquata   Otetxoria/Pitxartxar

Serinus serinus   Txirriskila

Streptopelia decaocto Tortola turkoa/Usapal turkiarra

Sturnus unicolor Tordantxa/Arabazozoa

Sturnus vulgaris Pasako tordantxa/Arabazozo pikarta

Sylvia atricapilla     Txinbo kaskabeltz

Troglodytes troglodytes Herritterri/Txepetxa

Turdus merula Zozoa

Turdus philomelos   Bierrua/ Birigarroa

Pitxartxar edo Otetxoria

(Saxicola torquata)

Arrano sugezalea urtero bezala

    Arrano sugezalea (Circaetus gallicus) urtero ikusi ohi dut martxoaren amaieran gure inguruak zeharkatzen. Ia bi metrokohego zabalera duen harrapari hau, oso gertutik ikusi dezakegu, izan ere asko jaisten da bere hegaldietan. Orban marroi txikiak gorputz zurian eta bere tamaina nahikoa dira urte sasoi honetan zein hegaztiz ari garen jakiteko. Frantzia aldera doan arrano hau urtero ikustea tokatzen zaigu egun hauetan, ondoren ez badugu ikusiko ere, atsegina da musker eta sugejale handi hau gure herria bisitatzen udaberriro ikustea Landetako pinudietara bidean.

Arrano sugezalea

(Circaetus gallicus)

Sai zuriak Aralar gainetik

       Gaurkoan sai zuria (Neophron percnopterus) izan da protagonista gure zeruan. Afrikan ostruken arraultzak harriak erabiliz puskatzeari utzi eta kumatzera dator Euskal Herrira. Sai zuriak jakintsu fama du, herramintak erabiltzeko habilidadea duen animalietako bat dugu. Harriak altuera handitik jaurti ohi ditu ostrukaren arraultz gogorrak apurtzeko. Agian gure artean ostrukak hazten dituzten baserriren bat ikusi eta gogora etorriko zaizkio Afrikako paisaiak. Hemen bere ahaide diren sai arreek utzitako sarraski apurretaz bizi beharko dute. Kabian hazitako kumeak hegan egiteko prest dituztenean alde egingo dute berriro ere hegoalderantz. Uda amaitu baino lehen itzuliko dira ostruken artean bizitzera.

Sai zuria

(Neophron percnopterus)

Miru beltzak bueltan

Atzo iñereak eta gaur miru beltzak(Milvus migrans). Miru gorriak (Milvus milvus) berarekin partekatu beharko ditu zeruak. Airean traketsagoa da Afrikatik datorren miru berri hau. Bere koloreak ere ez dira miru gorriarenak bezain ederrak. Udaberria hemen dugu mendietako elurrak urtzen hasteko prest. Espezie desberdinen aldaketa sasoia dugu. Udazkeneko pasa eta udaberriko kontrapasa. Egun hauetan adi ibili behar!

Miru beltza

(Milvus migrans)

Iñereak iritsi dira

       Gaur arratsaldean euria eta hotza gurean. Betebeharrak beharturik kalea zapaldu behar izan dut etxeko sutondotik urrun. Halako batean lurretik hiru metrora hegan iñerea (Hirundo rustica) pasa zait albotik haizearen kontra borrokan. Kolore zuri-gorriak azpian eta beltz iluna gainetik, isatseko bi luma lodi edo antenekin, ezin hutsik egin. Udaberriaren igarle, bera baino lehen igaro dira iparralderantz zeruko bidaiari asko. Bere ostean badatoz bertan geratuko diren gure uda epeleko hegazti berriak.

Iñere arrunta

(Hirundo rustica)

Gailupak Olatzean

         Euria barra-barra eta uhalde ondotik gailupa (Pyrrhula pyrrhula) ar bat atera zait zubi azpitik sasietara. Basoko biztanlea da  gailupa fringilido ederra, dimorfismo sexuala adierazten duena bere eme marroiaren aldean.  Sandindeien behin ikusi nuen baina aspaldi hontan batere ikusi gabe nengoen pago arteko txori koloretsu hau. Neguak bultzatuta jaitsi ote den edo iparralderantz geldiune bat egin ote duen izan da nire zalantza. Nork jakin.

Gailupa

Pyrrhula pyrrhula